Trayectoria
Cinco años de proyectos basaos na tradición y l’idioma del país
D’una idea nacida tres la pandemia a un proyectu consolidáu na animación sociocultural asturiana.
LaBuelga naz en 2021 col oxetivu de crear proyectos d’animación sociocultural qu’usen como ferramientes la cultura popular, la tradición y la llingua asturiana. Dende’l principiu, el so trabayu desendolcóse en tres grandes ámbitos: l’ociu infantil y familiar, la educación non formal y la creación escénica.
Nel campu del ociu diseñamos xuegos tradicionales, talleres creativos, grandes xuegos y actividaes familiares que llegaron a conceyos y equipamientos culturales de tol país. A lo llargo d’estos años collaboramos con entidaes como la Sociedá Pública de Xestión y Promoción Turística y Cultural del Principáu d’Asturies, el Centru Niemeyer, el Parque de la Prehistoria de Teberga, el Serviciu de Normalización Llingüística de Xixón y numberosos conceyos asturianos.
Na educación non formal impulsamos cursos, talleres, actividaes estraescolares, campamentos y programes de conciliación. Destaca la dirección del Campamentu de Branu de Reciella, íntegramente n’asturianu, amás de la coordinación d’actividaes teatrales en colexos, institutos y universidaes populares.
L’actividá escénica constitúi otra de les señes d’identidá de LaBuelga. Produximos y coordinamos espectáculos, conferencies dramatizaes, radioteatru, cuentacuentos y visites teatralizaes, collaborando con compañíes y colectivos como Cuatro Gotes, FETEAS, Teatru Nun Tris o l’Asociación Cultural Reciella.
Esta esperiencia permitió convertir LaBuelga nun proyectu cultural versátil, capaz d’adaptase a públicos y espacios bien distintos, pero siempre col mesmu compromisu: poner en valor la cultura asturiana al traviés de propuestes creatives, participatives y de calidá.
Sergio Buelga
Xixón, 1979
Con más de venti años d’esperiencia nel ámbitu de l’animación sociocultural, la educación non formal y les artes escéniques, Sergio Manuel Buelga desenvolvió la so carrera como monitor d’ociu y tiempu llibre, director de campamentos, actor, narrador oral, director d’escena y dramaturgu.
Dende 2020 dirixe laBuelga Animación y Cultura, un proyectu especializáu na creación d’actividaes que ponen en valor la cultura, la tradición y la llingua asturiana al traviés del xuegu, la educación y les artes escéniques.
Ye creador de propuestes como Olimpiaes Asturianes, Campus Reciella, Un sieglu de Teatru Popular Asturianu o Los cuentos d’un pelegrín… que va de vuelta, ente otros proyectos desarrollaos pa públicos infantiles, familiares, educativos y culturales.
A lo llargo de la so trayectoria collaboró con alministraciones públiques, centros educativos, compañíes teatrales, asociaciones culturales y entidaes privaes de tol país, consolidándose como un profesional especializáu na divulgación de la cultura asturiana y na dinamización cultural.