La Buelga participó nel programa Dar Xuegu, l’espaciu de RPA dedicáu a la información, divulgación y entretenimientu alredor de los deportes y xuegos tradicionales d’Asturies. Un programa que pon el focu nuna parte fundamental de la nuesa cultura popular: la manera de xugar, competir, compartir y tresmitir saberes dende’l territoriu y la memoria colectiva.
Nesti espaciu, los xuegos tradicionales conviértense nun puntu d’alcuentru ente xeneraciones, pueblos, asociaciones y persones que siguen calteniendo viva una forma propia d’entender el tiempu llibre, la convivencia y la identidá asturiana. Bolos, corta tradicional y otres práctiques populares tienen en Dar Xuegu un altavoz pa siguir siendo conocíes, practicaes y valoraes.
Pa La Buelga ye un prestu formar parte d’iniciatives que dan visibilidá al patrimoniu cultural asturianu y que ayuden a que neñes, neños y persones adultes s’averen a estes tradiciones d’una manera viva, cercana y participativa. Porque xugar tamién ye deprender, facer comunidá y siguir dexando güella.